Həzrət Fatiməi-Zəhranın (əleyhasəlam) şəhadəti

Bismilləhir-Rahmənir-Rahim

Həzrət Fatiməi-Zəhranın (əleyhasəlam) şəhadəti

Hicri-qəməri 1448-ci il cumadil-ula ayının 13-ü, miladi 2026-cı il oktyabrın 22-i, bəzi tarixi mənbələrə əsasən, həzrət Fatimei-Zəhra əleyha səlamın şəhadət günüdür.

Bəşər tarixinin üçüncü şəxsiyyəti olan bu əzəmətli xanımın şəhadəti haqqında bir neçə nəzər bəyan olunmuşdur. Həzrət Peyğəmbərə (sallallahu əleyhi və alih) və onun şərəfli Əhli-beytinə (əleyhimussəlam) sevgi və məhəbbət bəsləyən bütün müsəlmanlar bu qeyd edilən tarixlərdə Xanım Zəhranın (əleyhasəlam) xatirəsini əzəmətlə yad edirlər. Onlar Əhli-Beytin (əleyhiussəlam) qəmli-qüssəli günlərində şəriətin və böyük din alimlərinin tövsiyələrinə müvafiq əməlləri ilə Allahın sonuncu hüccəti həzrət Məhdi Sahib-zamanın (Allah onun zühurunu tezləşdirsin) razılığını ələ gətirib, qəlbinə təsəlli verirlər.

 Allah-taala bizlərə də o möminlərin sırasında yer versin və Əhli-Beytin (əleyhimussəlam) sevinc və kədərinə qoşulanlardan olaq, Amin!

Həzrət imam Sadiq əleyhissəlam bir hədisdə buyurur:

عَلِيُّ بْنُ إِبْرَاهِيمَ عَنْ أَبِيهِ عَنِ ابْنِ أَبِي عُمَيْرٍ عَنْ هِشَامِ بْنِ سَالِمٍ عَنْ أَبِي عَبْدِ اللَّهِ ع قَالَ سَمِعْتُهُ يَقُولُ‌ عَاشَتْ فَاطِمَةُ ع بَعْدَ أَبِيهَا خَمْسَةً وَ سَبْعِينَ يَوْماً لَمْ تُرَ كَاشِرَةً وَ لَا ضَاحِكَةً تَأْتِي قُبُورَ الشُّهَدَاءِ فِي كُلِّ جُمْعَةٍ مَرَّتَيْنِ- الْإِثْنَيْنَ وَ الْخَمِيسَ فَتَقُولُ هَاهُنَا كَانَ رَسُولُ اللَّهِ ص هَاهُنَا كَانَ الْمُشْرِكُونَ

Xanım Fatimə (salam olsun ona) atasından sonra 75 gün yaşadı və bu müddət ərzində onun heç vaxt gülümsədiyini və ya güldüyünü görən olmadı.

O, həftədə iki dəfə — bazar ertəsi və cümə axşamı günləri — şəhidlərin məzarlarını ziyarət edər və deyərdi: "Burada Allahın Peyğəmbəri (ona və ailəsinə salam olsun) dayanmışdı, orada isə müşriklər var idi".[1]

Həzrət Fatiməi-Zəhranın (salamullah əleyha) xütbəsindən bir fəqərənin şərhini əzizlərə təqdim edirik:

Allahın həmd və sənası

Həzrət Fatimə (əleyhasəlam) buyurdu:

فقالت علیها السلام

الحَمدُ لِلّه عَلَی ماأنعَمَ وَ لَه‌ُ الشُّکرُ عَلی ما ألْهَم

Həmd, verdiyi nemətlərə görə Allaha məxsusdur. Şükür də, ilham etdiyi şeylərə görə yalnız Onun üçündür.

Həmd (tərif etmək) və mədhin fərqi:

1- Qeyd edildiyi kimi, *həmd* (tərif) termini, təriflənən şəxsin öz iradəsi ilə həyata keçirdiyi fəzilətli bir əmələ cavab olaraq ifadə edilən tərif və övgü mənasını daşıyır.

2- Mədh isə, həm bu cür tərifi, həm də qeyri-ixtiyari bir hərəkətə görə edilən tərifi özündə ehtiva edir.

Məsələn, demək olar ki: "Mən filan şəxsi onda olan nəcib xüsusiyyətlərə görə təriflədim və mədh etdim"; lakin bir incinin parıltısı və ya çiçəyin xoş ətri barədə "həmd etdim" (təriflədim) demərik, yalnız "mədh etdim" (vəsf etdim) deyə bilərik.