“Hüzuri- qəlb” məsələsində qəlb sözünün mənası

Bismilləhir- Rahmənir- Rahim

“Hüzuri-qəlb” məsələsində qəlb sözünün mənası

لَهُمْ قُلُوبٌ لاَ يَفْقَهُونَ بِهَا وَلَهُمْ أَعْيُنٌ لاَ يُبْصِرُونَ بِهَا

“Onların qəlbləri vardır, lakin onunla (həqiqətləri) anlamırlar və onların gözləri vardır, lakin onunla görmürlər.”[1]

Namaz qılanlar, seyri-süluk[2] və ibadət əhli üçün bu məsələ aydındır ki, namazın həqiqətlərinə, eləcə də hər bir ibadətin həqiqətinə çatmaq, ancaq “zəvahir” (zahirlər) əsasında və şəriət yolu vasitəsilə mümkündür. Yəni ancaq bir halda biz namazın həqiqətinə yol tapıb onun barəsində müəyyən qədər məlumata yiyələnə bilərik ki, namazın zahirini, əhkamını, şəraitini və zahiri qaydalarını riayət edək. Əks təqdirdə, bu zahirin mühəqqəq olmadığı surətdə, o batinə yetişmək mümkün deyildir. Batinə yetişmək üçün gərək zahirin şəraitini kamilən riayət etmək lazımdır. Mərhum İmam (Allah ondan razı olsun) “Şərhi- Fusus” kitabına yazdığı təliqədə buyurublar: “Təriqət və həqiqət, yalnız şəriət yolu ilə hasil olur, çünki batinin yolu zahirdən keçir. Demək, əgər bir kəs ilahi təklifləri yerinə yetirməklə batinə yol tapa bilmədiyini görsə, bilsin ki, zahirə düzgün əməl etməmişdir.”